SIRI YA MBUNGE WA KIGOMA ZITTO KABWE

SIRI za Mbunge wa Kigoma Kaskazini, Zitto Kabwe, kukimbilia mahakamani kuzuia Kamati Kuu (CC) ya CHADEMA isijadili uanachama wake zimeanza kuvuja.

Habari zilizolifikia Tanzania Daima Jumapili, zinabainisha kuwa Zitto, aliyevuliwa nyadhifa zote ndani ya CHADEMA mwishoni mwa mwaka jana kwa madai ya kukisaliti na kukihujumu chama, alifikia uamuzi huo baada ya kudokezwa kuwa wajumbe wengi wamedhamiria afukuzwe uanachama.

Kwa mujibu wa taarifa hizo, baadhi ya wajumbe walikuwa wakifanya ushawishi kwa wenzao ili waunge mkono hoja ya kumvua uanachama Zitto pindi wakianza kujadili suala lake.

Inadaiwa kuwa wajumbe hao walichoshwa na vitendo vya mbunge huyo kukiumiza chama na viongozi wakuu katika mikutano aliyoifanya mkoani Kigoma hivi karibuni.

Inadaiwa kuwa wajumbe hao waliona ni heri CHADEMA ikose Jimbo la Kigoma Kaskazini kuliko kuendelea kuwa na Zitto ndani ya chama hicho.

Zitto, inaaminika hana ushawishi mkubwa ndani ya CC kama ilivyo nje, hivyo kumfanya ahahe kujinusuru na kuvuliwa unachama baada ya mwishoni mwa mwaka jana kuvuliwa madaraka yote aliyonayo ndani ya chama.

Tanzania Daima Jumapili, limedokezwa kuwa kutokana na hofu ya kufukuzwa kwenye chama, Zitto aliamua kwenda mahakamani kuzuia CC isijadili suala lake hadi rufaa aliyoikata mwaka jana katika Baraza Kuu la chama hicho itakaposikilizwa.

Inaelezwa kuwa Mbunge wa Arusha Mjini, Godbless Lema, na Mchungaji Peter Msigwa wa Iringa Mjini, ni miongoni mwa wajumbe wanaotaka Zitto afukuzwe ili iwe fundisho kwa wanachama wengine wanaokwenda kinyume na taratibu za chama.

Wakati hali ikionekana kuwa tete ndani ya CHADEMA, hatima ya Zitto inatarajiwa kujulikana kesho wakati Mahakama Kuu chini ya Jaji John Utamwa itakapotoa hukumu dhidi ya shauri lililofunguliwa na mbunge huyo.

Juzi, Jaji Utamwa alizuia CC ya CHADEMA kwa muda kujadili uanachama wa Zitto hadi kesho atakapotoa uamuzi wa jambo hilo.

Hata hivyo, tayari suala la Zitto limesababisha mpasuko mkubwa ndani ya chama ambapo kuna pande mbili kubwa, moja ikiunga mkono uamuzi wa kuvuliwa nyadhifa zote kiongozi huyo, huku nyingine ikipinga.

Pande hizo juzi zilikutana mahakamani zikiwa na mabango yenye ujumbe wa kumpinga Zitto na wengine kumuunga mkono.

Hatua ya Zitto kwenda mahakamani imemuweka katika mazingira magumu ya kuepuka kuondolewa uanachama wake ambapo baadhi ya makada wamekuwa wakimuita msaliti kwa hatua yake hiyo.

Wakati wenzake wakimuona msaliti, Zitto mara kadhaa amekuwa akijinasibu kuwa atapigania uanachama wake ndani ya CHADEMA na hatang’oka hadi atakapoondolewa.

Wajumbe vurugu CC

Wakati suala la Zitto, likionekana kuwagawa baadhi ya wanachama wa CHADEMA, wajumbe wa Kamati Kuu walionekana kuwa na shauku ya kulijadili suala hilo.

Ingawa Mkurugenzi wa Habari na Uenezi wa CHADEMA ambaye pia ni Mbunge wa Ubungo, John Mnyika, alizuia lisijadiliwe kutokana na pingamizi lililowekwa mahakamani, baadhi ya wabunge walitaka kupuuza amri hiyo ya mahakama, lakini walizuiwa.

Mwesiga Baregu na Mabere Marando, inaelezwa walikuwa mstari wa mbele kupinga mjadala wa Zitto kwa maelezo kuwa ni busara chama kikaheshimu uamuzi wa mahakama.

Kilichojadiliwa CC

Mnyika, jana aliwadokezea waandishi wa habari jijini Dar es Salaam, kilichozungumzwa na vikao vya CC.

Alisema CHADEMA itaunganisha nguvu ya kudai haki kwa wananchi wote watakaokosa haki ya msingi ya kupiga kura katika mchakato wa kura ya maoni juu ya katiba mpya.

Aliongeza kuwa hoja hiyo inatokana na Tume ya Taifa ya Uchaguzi kutokuwa tayari kuboresha daftari la wapiga kura kwa lengo la kuwapa fursa wananchi kujiandikisha.

Mnyika alisema Kamati Kuu imesikitishwa na Tume ya Uchaguzi kushindwa kutoa kauli juu ya maboresho ya daftari hilo hali waliyoielezea kuwa inadhihirisha hofu ya chama chao kuwa tume hiyo haina uwezo na nia ya dhati ya kuhakikisha wananchi wanapata haki ya msingi ya kupitisha katiba waitakayo.

Alisema kutokana na hali hiyo, CHADEMA itafanya mikutano ya hadhara, maandamano na njia nyingine kuhakikisha haki ya msingi ya wananchi kupiga kura inaheshimiwa.

Mnyika alisema pia CHADEMA wamepokea rasimu ya pili ya mabadiliko ya katiba na kwamba katika hatua ya awali wameunga mkono pendekezo la kuwepo serikali tatu wakati mapendekezo mengine yakifanyiwa uchambuzi yakinifu kulinganisha na maoni yaliyotolewa na wananchi.

Alisema pia wameshindwa kuwajadili wanachama wawili wa chama hicho, Dk. Kitilla na Mwigamba kwa sababu wakati wakijadili ajenda za awali walikuwepo nje ya ukumbi wa mkutano, na kwamba muda wa kuwasikiliza ulipofika hawakuonekana katika eneo hilo.

Mnyika alisema Kamati Kuu ilikuwa na uwezo wa kupitia utetezi wao pasipo wahusika kuwepo ndani ya ukumbi wa mkutano, lakini ikaonekana itoe nafasi ya mwisho kwa wanachama hao ili waweze kuhudhuria na kujibu hoja zitakazojitokeza.

Akizungumzia majina ya wajumbe yaliyopelekwa kwa Rais Jakaya Kikwete kwa ajili ya uteuzi wa wabunge wa Bunge la Katiba, Mnyika alisema Kamati Kuu imeridhia majina manne yaliyopatikana na kwamba waliangalia sifa na ujuzi wa watu hao katika maeneo mbalimbali ya kijamii na ufahamu wao juu ya katiba.

Aliyataja majina ya watu waliopendekezwa kuwa ni Wakili Marando, Profesa Abdallah Safari, Wakili Method Kimomogoro na Nasra Juma Baruani anayewawakilisha wanawake